COVID-19 KAI LOH NAN MIDANG HLATA AWM (SOCIAL DISTANCING)
COVID-19 hi boruakah amaha lo piang a ni ngawt lo va. He natna veitu, novel coronavirus hrik paite lak atanga kai chhawn a ni. He natna hi droplet infection an ti a, chu chu a hrikpaitute khuh emaw hahchhiau emaw atanga lo chhuak kha mihring mitah te, kaah leh hnarah te emaw a luh khan an lo inkai chhawng ta thin a. Hei hi inkaichhawn dan awlsam ber a ni. Chuvangin, he natna kan inkaichhawn zel lohna turin hriselna lama mithiamte chuan midang hnaiha awm lo tur leh, midang nen kan inkarah feet ruk tal tlak tir zel turin mipuite min ngen mawlh mawlh a ni.
Mizo mipuite pawhin midang hlata awm (social distancing) kan hre lar tawh hle a. Chutihlaiin, a awmzia man fuh lo tam tak kan awm niin a hriat a. Mamawh kan lei dawnin intlar ngei ngei a ngaih chang a awm a. Gas la tur intlar, gas bur khat tak taka rem tlar a, a viltu mihring awm khawm leh tel tel si thlalak hmuh tur a awm nawk mai. Kan gas bur emaw, kan ration lakna tur ip te inhlat taka rem khan min chhanhim dawn lo a, a la tu mipui zawkte hi midang hlata kan awm a tul tih i hre thar ang u. Loh theihloha chhuah ngai duty te pawhin hei hi kan him tlanna tur a nih hriaiin i fimkhur lehzual ang u.